तीन दिनको फरकमा बाग्लुङमा पल्टियो दुई जिप, ६ जना सधैंका लागि अस्ताए

---

२७ कार्तिक ,भरतपुर।

समिर चापागाईं

सोमबार बाग्लुङमा जीप दुर्घटना हुँदा पाँच जना सधैंका लागि अस्ताए। जैमिनी नगरपालिका ८ छिस्तीबाट सदरमुकाम बाग्लुङतर्फ जाँदै गरेको यात्रुवाहक बोलेरो जीप बिहान करिब ८ बजेको समयमा जैमिनी ७ ढुङ्गे खानी भीरमा आइपुग्दा दुर्घटनामा पर्यो।घुम्ती मोडबाट अनियन्त्रित भएर जिप करिब ४०० मिटर तल खोँचमा बजारियो।

पिकअप जिपमा छ जना सधैंजसो आआफ्नो गन्तव्यका लागि हिँडेका थिए। गन्तव्यमा पुग्न नपाई छ जनामध्ये पाँच जनाले दुःखद मृत्युवरण गर्नुपर्यो।घिक्क घीक्क सास बाँकी रहेका घाइते गंगाबहादुर श्रीषलाई भने नगरपालिकाको एम्बुलेन्समा तुरुन्त बाग्लुङकै धौलागिरी अस्पतालमा उपचारका लागि लगियो। बाँकी मृतक चालक सहित पाँच जनाको प्रहरीले सनाखत प्रकिया शुरु गर्यो।

सनाखत हुनेहरुमा एकै ठाउँका जिप चालक बागलुङ जैमिनी न.पा.०८ किवई बस्ने अन्दाजी बर्ष ३८ को महेन्द्र पुन सँगै अन्दाजी बर्ष २० की रश्मी श्रीष , अन्दाजी वर्ष ५० की नन्दकली पुन, अन्दाजी वर्ष १७ को निरज श्रीष र अन्दाजी वर्ष ७५ को कुल प्रसाद श्रीष थिए।

तीन दिन अगाडि कार्तिक २३ गते जीप दुर्घटनामा परी चालक किसान बिक को मृत्युबाट शोक सेलाउन नपाउँदै बाग्लुङ अर्को शोकमा छ। आजभन्दा तीन दिन अघि करिब ८ बजेको समयमा बाग्लुङको ढोरपाटन नगरपालिका ३ टारी बाङ्ग्रे भिर स्थित सडक खण्डमा यस्तै कहालीलाग्दो दुर्घटनामा परि किसान विकले आफ्नो ज्यान गुमाए।

सोही सडक खण्डमा बुर्तिबाङदेखि घोसातर्फ जाँदै गरेको लु १ च ६९३८ नम्बरको पिकअप जीप चालकले नियन्त्रण गुमाएसंगै करिब ५०० मिटर तल बडीगार्ड खोलामा बजारिएको थियो। सोही दुर्घटनामा परी बाग्लुङको पुर्कोट गाउँ शोकमा थियो। पुर्कोट बस्ने वर्ष ३६ का किसान बिकको घटनास्थलमै मृत्यु भएको थियो।

करिब तीन दिनको फरकमा बाग्लुङमा दुई दुःखद दुर्घटना देखेका ट्राफिक प्रहरी कार्यालय बाग्लुङका प्रमुख सुमन न्युरे स्तब्ध छन्। उनका अनुसार बाग्लुङमा कच्ची सडककै कारण दुर्घटना हुने गर्दछ। सोमबार  भएको दुर्घटना कुस्मिसेरा पोस्टबाट टाढा छ,ट्राफिक प्रहरी प्रमुख न्युरेले भने।

“चाडबाडको बीचमा कुनै पनि दुर्घटना भएको थिएन। गाउँबाट झरेको जिपमा स्टेरिङ काटिएन र सोमबार दुःखद दुर्घटना हुन पुग्यो। भूगोल पनि त्यस्तै छ।” प्रमुख न्युरेका अनुसार घुम्तिमा माथिबाट तल झर्दा स्टेरिङ नकाटिदा नघुमिकन सिधै तल झरेको प्रारम्भिक अनुसन्धानबाट खुलेको छ। जिप ढुङ्गेखानीको भिरबाट करिब ५०० मिटर तल खसेको उनको भनाइ छ।

बाग्लुङमा अस्थायी रुट पर्मिट कायम नभएको सडक स्थानीय आवश्यकतालाई पूरा गर्न खोलिएका छन्। रुट पर्मिट नै जारी नभएको सडक खण्डमा जिप संचालनमा रहेको ट्राफिक प्रहरी प्रमुख न्युरेको भनाइ छ।उनका अनुसार त्यो  रुटमा कति सवारी साधन चल्छन् भन्ने एकिन तथ्याङ्क छैन।

यस्तै  सोही ठाउँबाट निर्वाचित सांसद चित्रबहादुर केसीले बागलुङ दुर्घटनालाई देशमा हुन नसकेको समानुपातिक बजेट वितरण र बजेटमा आफ्नो क्षेत्रलाई गरेको विभेदको परिणाम भएको बताए।सरकारले आफ्नो क्षेत्रमा विकासका  योजना कम पार्दा कच्ची सडक लाई व्यवस्थित र सुरक्षित गराउन नसकिएको स्वीकार गरे।”संसदमा जति चिच्याए पनि अर्काको हातमा डाडु पनियो भएपछि केही गर्न नसकिँदो रहेछ,सांसद केसीले भने,”यस्तै हो भने यो व्यवस्थामाथि नै कालो बादल मडारिएको देख्दैछु”।