चितवनमा गैँडाको आक्रमणमा परी एकको मृत्यु ,पाँच जना घाइते

---

१६ पुस, चितवन ।

चितवनमा गैँडाको आक्रमणबाट एक महिलाको मृत्यु भएको छ । चितवनको रत्ननगर नगरपालिका वडा नं. १३ जयमंगलास्थित जंगलमा गैँडाको आक्रमणबाट एक महिलाको मृत्यु भएको चितवन प्रहरीले जनाएको छ ।

मृत्यु हुनेमा रत्ननगर १६ बस्ने ७० बर्षीया कृष्णाकुमारी थापा रहेको प्रहरीले बताएको छ  । दिउसो पौने २ वजे गैँडाको आक्रमणबाट गम्भिर घाइते भएकी थापाको उपचारका क्रममा दिउसो सवा २ वजे भरतपुर अस्पतालमा मृत्यु भएको हो ।

गैँडाको आक्रमणबाट अन्य ५ जना घाइते भएका छन् । घाइते हुनेहरुमा मृतक थापाका श्रीमान् ७८ बर्षका डम्बर बहादुर थापा, रत्ननगर १२ का ७२ वर्षका चेतनाथ चौलागाई वडा नं. १२ कै ३९ वर्षीया सीता पोखरेल, २५ बर्षिया पुजन विक, रत्ननगर १४ की ६० बार्षिया मिना गुरुङ रहेका छन । घाइतेहरुको भरतपुर अस्पतालमा उपचार चलिरहेको छ ।

त्यस्तै पूर्वी चितवनमा गैँडाको आक्रमणमा परी दुईजना घाइते भएका छन् । खैरहनी नगरपालिका–१ कासिगाउँका ४५ वर्षीया सीता नेपाल र ६० वर्षीया जानुका महत घाइते भएका हुन् । जिल्ला प्रहरी कार्यालयका प्रवक्ता भेषराज रिजालका अनुसार आज बिहान ६ः२० बजे घरमा आगो तापिरहेको समयमा गैँडाले आक्रमण गरेको हो । घाइते दुवैको भरतपुर अस्पतालमा उपचार भइरहेको छ । उनीहरुको अवस्था सामान्य रहेको प्रवक्ता रिजालले जानकारी दिनुभयो ।