चितवन निर्वाचन क्षेत्र नं. ३ बाट चितवनका युवा व्यावसायी चन्द्र विलास अधिकारीले स्वतन्त्र उम्मेद्वारी दिने घोषणा गरेका छन् ।
आज शुक्रबार भरतपुरमा पत्रकार सम्मेलन गर्दे अधिकारीले प्रतिनिधि सभा सदस्यमा आफ्नो उम्मेद्वारी रहने घोषणा गरे ।
चितवन क्षेत्र नं. ३ बाट नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, राप्रपाका उपाध्यक्ष विक्रम पाण्डे र एमालेका जिल्ला अध्यक्ष रामप्रसाद न्यौपानेले उम्मेद्वारी घोषणा गरिसकेका छन् ।
सोही क्षेत्रबाट युवा व्यावसायी चन्द्रविलासले स्वतन्त्ररुपमा उम्मेद्वारी दिन लागेका हुन् । उनले ह्यासट्याग # म पनि आउँदै छु नारा बोकेर प्रचार अभियान संचालन गरेका छन् ।
पत्रकार सम्मेलनमा उनले मेरो उम्मेद्वारी किन ? भनेर १० बुँदे एजेण्डा प्रस्तुत गरेका छन् । ११ नम्बरमा डटडटडट गरेर खाली छाडेका छन् । आम जनताले चाहेका अन्य एजेण्डालाई आफ्नो एजेण्डा बनाउन आफूले चाहेको र त्यसका लागि सल्लाह सुझाव दिन उनले आग्रह गरेका छन् । त्यही सल्लाह सुझावलाई समेट्न ११ नम्बर पछिको बुँदा खाली राखिएको उनको भनाइ छ ।
नेतृत्व परिवर्तन (युवा नेतृत्व), पार्टीहरुको सिन्डिकेट हटाउन, सरकारी शैक्षिक क्षेत्रको शैक्षिक गुणस्तर वृद्धि गरी हरेक नागरिकको पहुँचमा निःशुल्क गुणस्तर शिक्षा पु¥याउन, सरकारी स्वास्थ्य केन्द्र तथा अस्पतालहरुको स्तरोन्नति गरी गुणस्तरीय स्वास्थ्य सेवा प्रदान गर्न, गुणस्तरीय र दिगो विकास निर्माण गर्न, पार्टीका भातृ संगठनहरु विघटन गरी हरेक सरकारी तथा सामाजिक संघसंस्थाहरुबाट पार्टीगत गुटबन्दीको अन्त्य गर्न, दक्ष जनशक्ति उत्पादन गर्न, देशमा व्यापक रुपमा नीति नियममा सुधार गर्न, एक जिल्ला एक मेघा कृषि फार्म र कृषिमा आधुनिकिकरण गरी कृषि उत्पादन वृद्धि गर्न र हरेक सरकारी कार्यालयमा आर्थिक कारोबारको डिजिटलाइजेशन (Digitalization) गर्न आफ्नो उम्मेद्वारी रहेको भनि उनले दश बुँदा प्रस्तुत गरेका छन् ।
प्रतिकृया दिनुहोस्