रत्ननगर, जेठ १६ ।
माधवपुर गोल्डकप फुटबल प्रतियोगिताको दोस्रो सेमिफाइनलमा न्यू पञ्चदिप युवा क्लबलाई १-० ले हराउँदै सशस्त्र प्रहरी बल (एपीएफ) फाइनलमा प्रवेश गरेको छ। माधवपुर खेलमैदानमा भएको खेलमा एपीएफका सविन गुरुङले पहिलो हाफको १७औँ मिनेटमा डी बक्स नजिकैबाट प्रहार गरेको गोल निर्णायक बन्यो।
न्यू पञ्चदिपले पटकपटक आक्रमण गरे पनि गोल गर्न नसक्दा हार बेहोर्नुपर्यो। दुई विदेशी खेलाडीसहित युवा स्टार एरोन थापालाई मैदानमा उतारेको पञ्चदिपले दर्शकको उत्साहपूर्ण समर्थनका बावजुद फाइनलमा स्थान बनाउन सकेन। समूह चरणमा प्याराडाइज युवा क्लब सिसुवारलाई हराएर सेमिफाइनल पुगेको पञ्चदिपको यात्रा सेमिफाइनलमै टुङ्गियो।
फाइनल खेल जेठ १७ गते शनिबार अभिषेक चर्च रजहरसँग हुनेछ। अभिषेकले पहिलो सेमिफाइनलमा बागमती फुटबल एकेडेमीलाई टाइब्रेकरमा ७-६ ले हराएर फाइनलमा स्थान पक्का गरेको थियो।
प्रतियोगिता माधवपुर खेलकुद विकास समितिको आयोजना र एक्सपर्ट एजुकेशन एन्ड भिजा सर्भिसेज प्रा.लि.को मुख्य प्रायोजनमा सञ्चालित छ । प्रतियोगिताको विजेताले २ लाख २२ हजार २२२ रुपैयाँ, शिल्ड, मेडल र प्रमाणपत्र पाउनेछ भने उपविजेताले १ लाख ११ हजार १११ रुपैयाँसहित शिल्ड, मेडल र प्रमाणपत्र प्राप्त गर्नेछ। म्यान अफ द म्याच, उत्कृष्ट गोलरक्षक, उत्कृष्ट खेलाडी र सर्वाधिक गोलकर्तालाई विशेष मेडल दिइनेछ।
प्रतिकृया दिनुहोस्