एक्सपर्ट पब्लिक स्पिकिङ च्याम्प:माडी अडिसन सकियाे ,मङ्सिर ८ मा गैंडाकोटमा

एक्सपर्ट पब्लिक स्पिकिङ च्याम्पको तेस्रो संस्करण आज माडीबाट सुरुभएको छ ।मंगलबार माडीमा पहिलो अडिसन गरेर प्रतियोगिताको औपचारिक रुपमा शुरुवात गरिएको हो।

माडी वसन्तपुरस्थित माडी क्याम्पसको सभाहलमा भएको छनौट चरणमा माडीक्षेत्रमा रहेका आधारभूत तथा माध्यमिक विद्यालयका विद्यार्थीहरुको उत्साहजनक सहभागिता रहेको थियो। माडीमा आयोजना गरिएको अडिसनले विद्यार्थीहरुमा भएको वाककला प्रतिभा प्रस्फुटन गर्न सफल भएको आयोजक संस्था विमोचन इभेन्ट एण्ड इन्टरटेनमेन्ट प्रालिका निर्देशक विमोचन आचार्यले बताउनुभयो । उहाँले यस्ता प्रतियोगिताले विद्यार्थीमा भएको अन्तरनिहित वाककला प्रतिभा बाहिर ल्याउन टेवा पुग्नेमा विश्वास व्यक्त गर्नुभयो ।

उहाँले अघिल्लो संस्करणमा माडी क्षेत्रमा बाढी आएका कारण बिच बाटोबाटै फर्किनुपरेको बताउँदै  यस पटकको संस्करणमा भने सौहार्दपूर्ण तवरले  अडिसन सम्पन् भएकाे बताउनुभयो।

यस्तै माडी अडिसनमा विद्यार्थीहरुले माइक्रोफोनमा आफ्ना विचार अभिव्यक्त गर्न सकेकोमा अडिसनकी निर्णायक अजिता अधिकारीले खुशी व्यक्त गर्नुभयो। वाककला विद्यार्थीहरूका लागि महत्वपूर्ण सीप भएकाले विद्यालयले प्रतिभावानहरुको लागि तालिम तथा अवसर दिनुपर्नेमा अधिकारीले जोड दिनुभयो ।

गैंडाकोट , पश्चिम चितवन , कावासोती, पर्सा , टाँडी र भरतपुरमा अब  क्रमशः मङ्सिर ८ ,९, १५ , १९,२२ र ३० गते अडिसन हुदैँछ ।सबैक्षेत्रको अडिसन सकिएपश्चात एकमुष्ट दोस्रो राउण्डमा पुग्नेहरुको नतिजा सार्वजनिक गरिने र  तीन दिने निशुल्क तालिम दिएर दोस्रो,तेस्रो ,क्वाटरफाइनल ,सेमिफाइनल हुँदै फाइनलमा प्रतिस्पर्धा गराइने आयोजकले जानकारी दिएको छ ।

पहिलो र दोस्रो संस्करण सफलतापूर्वक सम्पन्न गरेको इभेन्टसको यो तेस्रो संस्करण हो । पहिलो संस्करणमा अरोमा कलेजका चिन्तामणि सुवेदी पहिलो, वाल्मीकि शिक्षा सदनकी साधना पौडेल दोस्रो र न्यू क्यापिटल कलेजकी ज्योति शर्मा तेस्रो भएका थिए । यस्तै दोस्रो संस्करणमा अरोमा कलेजका सौगात आचार्य पहिलो, एकता शिशु निकेतनका आशिष बन्जारा दोस्रो र स्काइराइडर स्कुलकी आयुश्मा पोखरेल तेस्रो भएका थिए ।

करिब ३ महिना सम्म चल्ने प्रतिस्पर्धाको फाइनल माघ २६ गते हुनेछ ।प्रतियोगितामा पहिलो हुने विजेताले ५० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २० हजार रुपैयाँ सहित मेडल ,ट्रफी , प्रमाण पत्र र छात्रवृत्ति पाउनेछन् । प्रतियाेगिताकाे सहजिकरण चितवनका संचारकमी समीर चापागाँइले गनुभएकाे छ ।