पाँच वर्षमा दशवर्ष बराबरको काम गरेर देखाउँछु – विक्रम पाण्डे

कात्तिक २६,चनौली ।

चितवन क्षेत्र नं.३ का लागि प्रतिनिधिसभा सदस्य पदका उम्मेदवार विक्रम पाण्डेले आगामी पाँच वर्षमा दश वर्ष बराबरको काम गरेर देखाउने दाबी गर्नुभएको छ। भरतपुर–२० चनौली बजारमा भएको चुनावी कोणसभालाई सम्बोधन गर्दै नेता पाण्डेले गएको पाँच वर्ष आफ्नो अनुपस्थिति रहँदा पश्चिम चितवनको विकासमा पाँच वर्ष पछि धकेलिएको बताउनुभयो। पूर्वमन्त्रीसमेत रहनुभएका नेता पाण्डेले २०७४ सालको निर्वाचनमा जनताले चुनेर पठाएको नेतृत्वले जनताको मतको सदुपयोग नगरिदिँदा जनताले दुःख पाएको बताउनुभयो। 
मंसिर ४ गते हुन लागेको निर्वाचन यसअघिका निर्वाचनभन्दा फरक र विशेष हुने उहाँको भनाइ छ। त्यसैले यो निर्वाचनमा सही नेतृत्व चुन्ने मौका गुमाएमा देश विकासमा २० वर्ष पछि धकेलिने बताउनुभयो। गएको पाँच वर्षकै अवस्था हेर्ने हो भने पनि देशबाट युवाहरूको विदेशिने लहर कम हुनुको सट्टा झन् बढ्दै गएको नेता पाण्डेले बताउनुभयो।

चितवन जस्तो उर्वर भूमि भएको ठाउँमा कृषि उत्पादनलाई बढाउने र पर्यटन प्रवद्र्धन गराउन सके विदेशबाट पठाउने रेमिट्यान्सभन्दा बढी आर्थिक स्रोत स्वदेशमै जुटाउन सकिने उहाँको भनाइ छ। ७७ जिल्लामा नमुना काम गरेर देखाउने अठोट लिएर यसपटकको निर्वाचनमा होमिएको पनि नेता पाण्डेले बताउनुभयो। ‘म सांसद बन्ने रहर भएर आएको होइन, देशकै नमुना क्षेत्र बनाउँछु भन्ने सोचका साथ कम्मर कसेर लागेको छु,’ उहाँले भन्नुभयो, ‘किनकि सुरुवात आफैँबाट गर्नुपर्छ।’

यसअघिको निर्वाचनमा पर्यटकलाई विश्वास गर्दा फर्केर पनि नआउने समस्या बढ्दै गएको उहाँले बताउनुभयो। पर्यटकलाई विश्वास गर्दा चितवन–३ तालिम केन्द्र जस्तो मात्रै भएको उहाँको भनाइ छ। ‘सिक्नुपर्ने काम यहाँ सिक्छन्, प्रयोग गर्नेबेलामा अन्तै जान्छन्,’ उहाँले भन्नुभयो, ‘अब यस्ता पर्यटकलाई विश्वास गर्नुभन्दा पहिले एकपटक सोच्नु आवश्यक छ।’

यसपटकको निर्वाचनपछि चितवनलाई कृषि पर्यटनको क्षेत्रमा विशेष काम गर्ने दीगो सोच बोकेर आएको उहाँले बताउनुभयो। पुलचोकदेखि गोलाघाट हुँदै सौराहासम्म जोड्ने गरी पर्यटकीय मार्ग निर्माण गर्ने योजना रहेको पनि उहाँले सुनाउनुभयो। यसो गर्दा नारायणी नदी र राप्तीले गरेको खेतीयोग्य जमिनको कटानको समस्यासमेत रोकिने उहाँको भनाइ छ।

‘सफलता पाउनको लागि धेरै काम गर्नै पर्दैन, आफूले थालेको काम मात्रै पूरा गरिदिए त्यसै सफल भइन्छ,’ नेता पाण्डेले भन्नुभयो, ‘त्यसैले मैले मेरो कार्यकालमा बोलेका कामलाई पूरा गर्ने गरी नेतृत्व सम्हाल्नको लागि मात्रै आएको हुँ।’ जनता र किसानका लागि आवश्यक काम गर्दा कुनै कानुन र नीति नियमले छेक्छ भने त्यसलाई शांशोधन गरेर काम गर्न सकिने नेता पाण्डेको भनाइ छ।

‘त्यसैले चितवन–३ मा मलाई जिम्मा दिनुस्, म दश वर्षमा गर्नुपर्ने काम पाँच वर्षमै गरेर देखाइदिन्छु,’ उहाँले भन्नुभयो, ‘अरू नेताले जस्तो आकाशे पुलको सपना मैले बाँड्न जानेको छैन। जुन काम गर्न सक्छु, त्यत्तिमात्रै बोल्छु।’