मंसिर ४ पछि उज्यालो सुरू : विक्रम पाण्डे

चितवन कार्तिक ३० ।

राप्रपाका वरिष्ठ उपाध्यक्ष विक्रम पाण्डेले मंसिर ४ पछि उज्यालो दिन सुरू हुने बताएका छन् । भरतपुर–१७ पाल्पाली टोलमा सिर्जना आमा समूह र गोरखाली आमा समूहले आयोजना गरेको चुनावी सभालाई सम्बोधन गर्दै पूर्वमन्त्रीसमेत रहेका नेता पाण्डेले २०७४ सालको निर्वाचनपछि कालो दिन सुरू भएकोले गएको पाँच वर्ष चितवन–३ का जनताले उज्यालोको अनुभव गर्न नपाएको बताएका हुन् ।

हरेक निर्वाचनमा जनता ढाँट्ने काममात्रै भइरहेको उनको भनाइ छ । त्यसैले अबको निर्वाचनमा कुनै पनि मतदाता भ्रममा नपर्न पनि नेता पाण्डेले आग्रह गरे । केन्द्रदेखि स्थानीय तहसम्म एउटै दल र एउटै परिवारका सदस्यले काम गर्ने मौका पाउँदा पनि भ्रम छर्नेबाहेकको विकास नगरेको उनले आरोप लगाए ।

यस्तै ,,,,
पाण्डेले राष्ट्र द्रोहीलाई देशबाटै लखेट्नुपर्ने बताएका छन् । चुनावी घरदैलोको क्रममा भरतपुर–२६ ज्योतिनगरमा भएको चुनावी कोणसभालाई सम्बोधन गर्दै पूर्वमन्त्रीसमेत रहेका नेता पाण्डेले भने, ‘यो देश राष्ट्र द्रोहीकै कब्जामा भएकोले जनताको टाउकामाथि सधैँ ऋण थपिँदै गएको छ ।’

बैंकबाट ऋण लिएर लिएर खेतीपाती गर्न चाहने किसानले ऋणसमेत पाउन मुस्किल परेको उनले बताए । ठूला नेताले विदेशमा पैसा लुकाएकै कारण नेपाली नागरिकले पैसा चलाउन नपाएको उनको भनाइ छ । ‘बैंकमा गए पनि पैसा पाइँदैन, किसान र व्यापारीसँग त हुने कुरै भएन,’ उनले भने, ‘त्यसैले देशलाई कंगाल बनाउने राष्ट्र द्रोहीलाई मंसिर ४ पछि लखेट्नुपर्छ ।’

नेपाली जनताको लागि पनि विकासवादी र राष्ट्रप्रेमी नेतृत्व आवश्यक परेकोले आफूले उम्मेदवारी दिएर घरदैलोमा सहभागी भएको नेता पाण्डेले बताए । त्यसैले देश द्रोहीसँग बच्नुपर्ने दिन आएको उनले बताए । मतदानको समयमा मौन अवधि लागू भइसकेपछि पैसा बाँड्दै हिँडेका कुरा गत स्थानीय तहमा पनि देखिइसकेको हुँदा त्यस्ता व्यक्तिहरूबाट सचेत रहन पनि नेता पाण्डेले आग्रह गरे ।

‘भोट किन्ने र बेच्ने दुवै समाजका दुश्मन हुन्,’ उनले भने, ‘हाम्रै ढुकुटी लुटेर हामीलाई नै किन्न खोज्छन् भने त्यस्तालाई सजाय दिन जनता नै तयार हुनुपर्छ ।’