सिन्धुली, १८ भदौं ।
गएको भदौँ १० गते रसुवाको भोटेकोशी नदीमा आएको बिनासकारी बाढीबाट प्रभावित भएकाहरुका लागि सिन्धुलीमा पनि नगद र विभिन्न राहत सामाग्रीहरु सहयोग तथा संकलन भइरहेका छन् ।बाढी प्रभावितहरुको उद्धार, राहत तथा पुनःस्थापनाका लागि जिल्लाका स्थानीय सरकारहरु, विभिन्न संघसंस्था, विद्यालय, समुह, सहकारी मात्रै नभइ व्यक्तिगत रुपमा पनि सहयोग जुटीरहेको पाईन्छ ।
जिल्लाका नौ स्थानीय तह मध्ये हाल सम्म पाँच स्थानीय तह कमलामाई नगरपालिका, दुधौली नगरपालिका, तीनपाटन, सुनकोशी र मरिण गाउँपालिकाले राहत प्रधानमन्त्री दैवी प्रकोप उद्धार कोषमा जम्मा गरेका छन् । कमलामाईले दैवी प्रकोप व्यवस्थापन कोषबाट २ लाख रुपैयाँ राहत जम्मा गर्ने निर्णय गरेको छ । कमलामाईका जनप्रतिनिधिहरुले मासिक भत्ताको १० प्रतिशत, कर्मचारीहरु र शिक्षकहरुल संघिय सरकारले तोके अनुसार कट्टा गरेर राहत बुझाउने नगरपालिकाले जनाएको छ ।
नगरपालिकाले भोटेकोशी बाढीमा मृत्युवरण भएका परिवारलाई जनही १५ हजार, घाईतेहरुलाई जनही १० हजार रुपैयाँ सहयोग गर्ने समेत निर्णय गरेको छ । बाढी प्रभावित परिवारका लागि बाढीग्रस्त क्षेत्र जानआउनका लागि ३ वटा चारपाङ्ग्रे गाडी उपलब्ध गराउने पनि निर्णय गरेको छ ।
दुधौली नगरपालिकाको ६८ औँ नगर कार्यपालिका बैठकले बाढीपीडितको राहतका लागि विपद् व्यवस्थापन कोषबाट ५ लाख उपलब्ध गराउने निर्णय गरेको छ ।कार्यवाहक नगर प्रमुख चन्द्र किशोर थारुको अध्यक्षतामा बसेको बैठकले नगरपालिकाका सम्पूर्ण कर्मचारीहरूको २ दिनको तलब कट्टा गरी प्रधानमन्त्री दैवी प्रकोप उद्धार कोषमा जम्मा गर्ने निर्णय पनि गरेको छ ।
यसका साथै, जनप्रतिनिधिहरूले आफ्नो मासिक भत्ताको १० प्रतिशत रकम राहत स्वरूप दिने भएका छन् । बाढीका कारण बेपत्ता भई ज्यान गुमाएको सनाखत भएमा नगरभित्रका मृतकका परिवारलाई २५,००० काजक्रिया खर्च दिने निर्णयसमेत नगरपालिकाले गरेको छ ।
तीनपाटन गाउँपालिकाको आज बसेको कार्यपालिका बैठकले भोटेकोशी बाढी प्रभावितका लागि विपद् व्यवस्थापन कोषबाट ३ लाख रुपैयाँ राहत सहयोग गर्ने निर्णय गरेको छ । कार्यपालिका बैठकले अध्यक्ष, उपाध्यक्ष, अधिकृतस्तरको कर्मचारी र मावि तहको शिक्षकको ७ दिन बराबरको रकम, वडाअध्यक्षहरु, निमावि तहका शिक्षक, पाँचौ र चौथो तहका कर्मचारीको हकमा ५ दिनको र वडा सदस्य र अन्य कर्मचारीहरुको २ दिनको तलब भत्ता बाढी प्रभावितलाई राहत उपलब्ध गराउने निर्णय भएको तीनपाटन गाउँपालिकाका अध्यक्ष कर्ण बहादुर मगरले जानकारी दिनुभयो ।
जिल्लाका स्थानीय तहहरु मध्ये सबैभन्दा पहिला निर्णय गर्दै मरिण गाउँपालिकाले आफ्नो विपद् व्यवस्थापन कोषबाट मानवीय सहायता स्वरूप २ लाख उपलब्ध गराएको छ । गाउँपालिका अध्यक्ष विमर्श मुक्तानका अनुसार नगदका साथै १० हजार थान स्यानिटरी प्याड र दुई कार्टुन आवश्यक औषधिजन्य सामग्री समेत प्रधानमन्त्री दैवी प्रकोप उद्धार कोष मार्फत प्रभावितहरुलाई सहयोग गरिएको छ ।
उता सुनकोशी गाउँपालिकाले पनि कर्मचारी तथा शिक्षकहरुको तर्फबाट संकलन भएको १३ लाख ३३ हजार ३ सय ३३ प्रधानमन्त्री दैवी प्रकोप उद्धार कोषमा जम्मा गरिसकेको छ । गाउँपालिकाका प्रशासन प्रमुख नवीन न्यौपानेका अनुसार कर्मचारीहरूबाट ४ लाख १७ हजार ७ सय २२ र शिक्षकहरूबाट ९ लाख १५ हजार ६ सय ११ संकलन भएको हो ।
यसका अतिरिक्त गाउँपालिकाले विपद् व्यवस्थापन कोषबाट रु। २ लाख राहत कार्यमा खर्च गर्ने निर्णय गरेको छ भने गाउँपालिका अध्यक्ष, उपाध्यक्ष, वडा अध्यक्ष तथा कार्यपालिका र वडा सदस्यहरूले समेत व्यक्तिगत रूपमा आर्थिक सहयोग गर्ने निर्णय गरेका छन् ।
जिल्ला प्रशासन कार्यालयका अनुसार प्रधानमन्त्री दैवी प्रकोप उद्धार कोषमा रकम जम्मा गरेर जानकारी गराएका मध्येबाट हाल सम्म झन्डै २५ लाख रुपैयाँ राहत सहयोग भएको छ । जिल्ला प्रशासनले सार्वजनिक गरेको विवरण अनुसार संघसंस्था तथा व्यक्तिगत गरी ३८ बटाबाट कुल २४ लाख ६७ हजार ६७६ रुपैयाँ राहत जम्मा भएको छ ।
प्रतिकृया दिनुहोस्